Arte relixiosa.

Vicente Juan Macip, Christ at the Column, 16th century

Somos un pobo cunha longa tradición de imaxinaría[1] relixiosa presente nas parroquias de Santiago en San Francisco, na de Santa María do Campo, en Galdo. Quizais o máis antigo que se conserve sexa ese Encontro que sae a mañá de Venres Santo, claramente emparentado cos autos sacramentais da Idade Media.

A Semana Santa de Viveiro é unha das celebracións relixiosas máis antigas de Galicia, que se vén realizando de modo ininterrompido dende o século XIII. Nesta conmemórase a paixón, morte e resurrección de Xesús de Nazaret a través dos diferentes actos, celebracións e procesións que realizan as confrarías[2]. Ademais do seu carácter relixioso, a Semana Santa viveirense é tamén considerada coma un acontecemento cultural popular, sendo declarada festa de interese turístico internacional en 2013.

Nas parroquias do entorno tamén se conservan fermos mostras de imaxinaría relixiosa que poden fornecer amplamente un  interesante museo permanente na cidade de Viveiro.

Imaxe de San Pedro da parroquia de San Pedro de Viveiro.

Imaxe de San Pedro da parroquia de San Pedro de Viveiro.

Unha das imaxes máis recentes é a de Noso Pai Xesús Nazareno, unha talla de  Francisco Romero Zafra que se expón na igrexa das Concepcionistas e que foi aportada pola Confraría O Nazareno dos de Fóra.

Nazareno

Nazareno


[1] imaxinaría
Para todas as acepcións Sinónimo imaxinería
substantivo feminino
1.Arte de esculpir ou pintar imaxes en particular imaxes relixiosas
Os seus primeiros pasos no mundo da escultura foron nun taller de imaxinaría relixiosa
2.Conxunto de imaxes particularmente relixiosas
A imaxinaría, os relevos e as pinturas do retablo do altar maior datan do século XVII.

[2] confraría

substantivo feminino

1.Historia. Asociación de persoas xeralmente laicas e devotas dun mesmo santo, que teñen como obxectivo a defensa ou axuda mutua dentro dun oficio ou a realización de accións piadosas.

Das confrarías xurdiron os gremios.

2.Asociación de laicos que se reúne con fins relixiosos, xeralmente para venerar e render culto a un santo ou a outro obxecto digno de devoción.

A procesión da confraría do Nazareno  Sinónimo: congregación.

3.Asociación de mariñeiros, armadores e mariscadores.

O patrón maior da confraría atópase reunido co Conselleiro de Pesca.

CELEIRO E O MAR.

Chincho con cachelos.

No verán, a todos nos gusta facer vida fóra, aproveitar a praia, as terrazas das cafetarías, paseos á beira do río… por iso tentamos facer comidas que non nos obriguen a botar moito tempo na cociña.

Ás veces este tipo de comidas son máis propias da cociña mediterránea que da cociña galega: ensaladas de pasta, de arroz, con froitas exóticas; de mil e unha maneiras.Pero tamén podemos botar man da nosa cociña máis tradicional.

Unha suxestión[1] é a que traemos hoxe: chincho fresquiño con cachelos.

chinchos

Os cachelos saben mellor que as simples patacas cocidas sen pela e acáenlle ben ao chicharro, ás sardiñas e ao polbo. Nunha ola rápida temos cocidas as patacas en seis minutos. Despois só temos que fritir os chicharriños que teremos areados[2] con sal.

CACHELOS

Chamamos chincho ao chicharro pequeno e por iso é máis doado fritilos ca nada. Se fose chicharro grande poderiamos poñelos ao forno.

En toda Europa é coñecido o chicharro ou xurelo. En galego distinguimos tamén o chincho cando é  de tamaño pequeno ao igual que distinguimos sardiña – de xouba / parrocha.

Velaquí tedes os nomes nas linguas próximas:

Nome científico: Trachurus Trachurus.

Chicharros na pescadería de Viveiro.


Nome común:

Español: Jurel,chicharro.
Catalán: Sorell, Sorell verd.
Vasco : Txitxarro ,arrunta.
Inglés: Atlantic horse mackerel.
Francés: Chinchard d´Europe.
portugués: Carapau.

Volvendo ao fío do que saímos, esta comida témola lista en 10 ou 12 minutos, que é o que buscamos, e deunos tempo pola mañá a facer unha visita á  peixería[3]  local, que sempre é un entretemento[4].

Notas

[1]  Suxestión. *suxerencia é forma incorrecta.

[2] Arear: Botar unhas areas de sal sobre [un alimento] para condimentalo Vou arear unhas sardiñas, que as vou facer nas brasas.
[3]  Forma correcta. *Pescadería é un castelanismo.
[4] Forma correcta. *Entretenimento é un castelanismo.