Coñezo a fotografía de Sebastião Salgado desde hai anos, desde que vin unha exposición das súas fotos sobre “Os Sen Terra” nos claustros de San Francisco, en Viveiro. Esa exposición pasou logo á Casa da Administración de Sargadelos en Cervo. Inda que o lugar non era o máis axeitado para expoñer fotografía, a forza das imaxes compensaban as carencias.
Sebastiãou Ribeiro Salgado nace en Aimorés, no estado de Minas Gerais (Brasil), o 8 de Febreiro do ano 1944. Estuda economía na Universidade de São Paulo e na Universidade de Venderbit (EUA). En 1968 logra o máster en economía. Entre os anos 1969 e 1971 viaxa a París onde obtén o doutorado na Escola Nacional de Estatística Económica.
Logo viaxa a Africa contratado pola Organización Internacional do Café, alí descobre a fotografía cando se dá conta de que lle era de gran axuda para documentar e ilustrar os seus traballos de economía. En 1973 xa de regreso en París, e logo de revisar as imaxes que obtivera en Africa decide abandonar a economía para dedicarse ao labor de reporteiro gráfico.
Nos seus primeiros traballos documentou a outra cara de Africa (Sahel) e os traballadores inmigrantes de Europa.Entre 1986 e 1993 desenvolve un proxecto para documentar a desaparición dos traballos manuais no mundo. O resultado do mesmo foi unha exposición e un libro “Workers”.
Desde 1980 ata 1997 traballou en Brasil nun proxecto por documentar aos traballadores rurais que loitan para recuperar as súas terras. O libro que xurdiu deste traballo chamouse “Terra” e conta cun prólogo de José Saramago e poemas de Chico Buarque. Parte das fotos foron doadas ao MST (Movimento dos Trabalhadores Rurais Sem Terra) de Brasil.
Un dos últimos proxectos de Salgado é Génesis, traballo resultado de fotografar durante oito anos animais e persoas que viven illadas no mundo moderno.
Acaba de aparecer un documental do que o fotógrafo é obxecto e protagonista: O sal da Terra. Os directores (o fillo do artista, Juliano Ribeiro Salgado, e o mestre alemán Wim Wenders) mesturan imaxes das viaxes do xenio brasileiro con secuencias do propio Salgado mirando a cámara e narrando a súa epopea. O resultado é un filme que foi aplaudido case unánimemente no último festival de Cannes (onde competiu na sección Una certa mirada e levou o Premio Especial) e que se estreou en España o 31 de outubro. E antes aínda, xa desde hoxe, podedes empezar a gozar do tráiler de O sal da Terra.